Alimlər süni mayalanma yolu ilə hamiləlikdən dünyaya gələn körpələrin sağlamlığında bir sıra fəsadların yarana biləcəyini söyləyirlər. Yeni tədqiqatların nəticələrinə görə, vitro fertilizasiya, yaxud IVF (Ekstrakorporal mayalanma) kimi reproduktiv texnologiyaların köməyi ilə doğulan uşaqlarda yüksək qan təzyiqi problemi meydana gələ bilər.

“Sciense.org” saytı xəbər verir ki, ABŞ Kardiologiya Kollecinin jurnalında dərc olunmuş məqalədə yeniyetmələr arasında yüksək qan təzyiqinin 3,5 faiz artmasının məhz bu səbəblərlə bağlı olduğu bildirilir. Harvard Tibb Məktəbinin kardioloqu Lari Veynrauxun sözlərinə görə, süni mayalanma yolu ilə hamilə qalan qadınların bətnində sağlam rüşeymin yaranma ehtimalı daha azdır. Kardioloq əlavə edib ki, 2014-cü ildə dünyada reproduktiv texnologiyaların köməyi ilə doğulan uşaqların sayı 8 milyon, 2017-ci ildə isə 11 milyondan çox olub. Bu körpələrin bir hissəsi hipertoniyadan əziyyət çəkir.

İsveçrənin Bern Universitetinin professoru Urs Şerrer də aparılan tədqiqatların nəticələrini şərh edib. Professor deyib ki, süni mayalanma və reproduktiv aparatların köməyi ilə doğulan körpələrin qan damarı elastiklik baxımından orta yaşlı adamlarda olduğu kimidir. Belə ki, damarların sərtliyi normal qan təzyiqinin pozulması ilə nəticələnir. Şerrer ginekoloq həkimlərə məsləhət görüb ki, bu cür halların qarşısını almaq üçün süni yollarla hamiləlik dövründə pasiyentləri daim nəzarət altında saxlasınlar və gələcək fəsadların qarşısını məhz bu mərhələdə alsınlar.

Məqalənin sonunda bildirilir ki, IVF metodu ilə dünyaya gələn ilk körpə - amerikalı Luis Braunun hazırda 40 yaşı var. Qan təzyiqindən əziyyət çəkən bu pasiyenti həkimlər mütəmadi olaraq müayinədən keçirir və lazımi müalicə tədbirləri görürlər. Tədqiqatın müəllifləri bu cür insanların xüsusi xəstəlik tarixçəsinin açılması və reproduktiv texnologiyalarla hamiləlik prosesinin təkmilləşdirilməsini yeganə çıxış yolu hesab edirlər.