Qətər rəhbərliyi Səudiyyə Ərəbistanı, Birləşmiş Ərəb Əmirlikləri, Misir və Bəhreynin embarqonu ləğv etmək üçün ötən gün irəli sürdüyü şərtli dialoq təklifini rədd edib. Bu barədə "Əl-Cəzirə" telekanalı məlumat yayıb. 

Qətərin xarici işlər naziri Şeyx Məhəmməd bin Əbdürrəhman əs-Sani ölkəsinə qarşı blokadanı beynəlxalq hüququn pozulması kimi qiymətləndirib. "Blokada tətbiq edən ölkələr bunun qeyri-qanuni olduğunu qəbul etməməkdə israr edir",-deyə Qətərin XİN rəhbəri "Əl-Cəzirəyə" açıqlamasında deyib.

Qeyd edək ki, dünən Behreyndə görüşən 4 ərəb ölkəsinin XİN rəhbərləri Qətərə müraciət edərək dialoq öncəsi bütün tələbləri qəbul etməyi istəmişdi. Qətərin dərhal yerinə yetirməli olduğu 13 maddəlik tələblər arasında ölkənin "Müsəlman Qardaşlar" Birliyinə dəstəyi dayandırması, "Əl-Cəzirəyə"ni bağlaması, İranla diplomatik əlaqələri kəsməsi və Türkiyə ilə hərbi əməkdaşlığa son qoyması var.