BMT himayəsi altında İsveçdəki görüşlərdə Yəmənli tərəflər arasında əldə edilən atəşkəs razılaşması Hudeydede yerli vaxtla 00.00-dan etibarən qüvvəyə minib.

 Yəmən xalqı üçün həyatı əhəmiyyət daşıyan Hudeyde limanı və şəhəri üçün əldə edilən razılığa görə, BMT limanda lider rolunu üzərinə götürüb. Yəmənə humanitar yardımların önünün açılması və beləliklə milyonlarla yəmənlinin həyat şərtlərinin yaxşılaşdırılması gözlənilir.

Şəhərdə dünən fərari prezident Mənsur Hadi və Ənsarullah Hərəkatına bağlı qüvvələr arasında toqquşmalar qeydə alınıb.

Xatırladaq ki, Səudiyyə rejiminin birbaşa diqtəsi ilə hökumət idarə edən Yəmən prezidenti Mənsur Hadi buna etiraz edən xalqa qarşı zor tətbiq etdikdən sonra ölkə boyu kütləvi aksiyalar həyata keçirilmişdi. Xalq Mənsur Hadidən islahatlar həyata keçirməyi və Səudiyyənin tapşırıqlarının yerinə yetirməməyi tələb edirdi. Uzun müddətli aksiyalar zamanı prezidentin əmri ilə xalqa qarşı sıxılan güllə vəziyyəti bir qədər də gərginləşdirdi və Mənsur Hadi ölkədən qaçaraq Səud rejiminə sığındı. Buradan isə öz xalqına qarşı müharibə elan etdi. Bəzi ərəb ölkələrini bu müharibəyə səslədi və yaradılan koalisiya bu gün də Yəməni bombalayır. Müharibə yolu ilə Yəmən xalqını təslim edə bilməyən Səud koalisiyası ABŞ-ın dəstəyi ilə Yəməni blokada şəraitində saxlayır. Hazırda 21 milyon əhalisi olan Yəmənin 80 faizi aclıqdan əziyyət çəkir. Vəbaya yoluxma halı 500.000-dən çoxdur. Onların 460 mini uşaqdır. Hazırda Yəməndə xalqın böyük dəstək verdiyi Ənsarullah Hərəkatı hakimiyyətdədir və Səud koalisiyasına qarşı mübarizə aparırlar.